វាលស្រែ វាលស្នេហ៍
១ ពេលព្រឹកព្រលឹម ញញឹមប្រិមប្រិយ បក្សាបក្សី ស្រែកយំអឺងកង
ហិចហើរច្រវាត់ ទាំងគូត្រសង ចេញចាកភូមិផង ប៉ងរកចំណី។
២ ព្រះអាទិត្យរះ ប៉ប្រះចុងស្រូវ សន្សើមយប់ជ្រៅ សល់នៅថ្មីៗ
រស្មីព្រិចៗ ដូចពេជ្រចរណៃ លើវាលស្រូវស្រី ពេលព្រឹកព្រលឹម។
៣ ក្នុងស្រែទឹកថ្លា ចាំងឆ្លុះយល់ភក្ត្រ យល់ស្រស់វរលក្ខ កំពុងញញឹម
មច្ឆាហែលឆ្លង ប៉ងក្ដីសង្ឃឹម ធម្មជាតិព្រលឹម ប្រលោមស្នេហា។
៤ ឱ!វាលល្វឹងល្វើយ ដាច់កន្ទុយភ្នែក សូមអ្នកកុំជ្រែក ញែកក្ដីមេត្តា
ទឹកស្ទឹងថ្លាយង់ គង់គាប់មច្ឆា បក្សីបក្សា គង់គាប់ទ្រនំ។
ដោយ: ណូត ខេមរិន្ទ (ខ្មែរសូវិននា)
១៩ សីហា ២០១៣
No comments:
Post a Comment