ដួងចន្ទដួងចិត្ត

ដួងចន្ទដួងចិត្ត ១ ដួងចន្ទរៀងរះឱភាសស្រទន់                  រៀមបានគយគន់គាប់នឹងដួងចៃ  រាត្រីត្រជាក់បងទាញយកស្បៃ                   ក្របប្រាណស្រស់ស្រីដោយក្ដីស្នេហ៍ស្និទ្ធ។ ២ រស្មីដូងចន្ទចាំងជាប់ចុងស្មៅ                   ចាំងឆ្លុះភក្រ្តពៅរៀមនៅនែបនិត្យ ក្រសោបឱបថ្នមលួងលោមផ្ដេកផ្ដិត            ស្រស់ស្រីវរមិត្រក្រោមស្បៃរាត្រី។ ៣ ពពករសាត់ផាត់ដោយវាតា​​                     ក្រអូបក្លិនផ្កាដូចក្លិនថ្ពាល់ស្រី ជំនោរបក់បោកខោកដងព្រឹក្សព្រៃ                ហាក់ជួយប្រាប់ស្រីថាបងស្ម័គ្រស្មោះ។ និពន្ធដោយ៖ ណូត ខេមរិន្ទ

ជើងមេឃសម្បថ

ជើងមេឃសម្បថ

​​​​​​​​​​​  (បទពាក្យប្រាំបី)

១ សម្លឹងមើលមេឃសង្វែគអាត្មា         នឹករឿងស្នេហាកន្លងផុតទៅ

រឿងស្នេហ៍អឌិតបងនិងពាលពៅ        ស្នេហ៍ដល់ជម្រៅដិតដាមឱរា។

២ សេកសោមរោមស្រស់ខ្សោះឈាមព្រោះស្នេហ៍ មេឃមីខ្មៅអែពាសអាកាសា

ងងឹតសូន្យឈឹងប្រឺងថ្លែងវាចា            សំណោកអក្ខរាចារឿងឥតន័យ។

៣ ទឹកបឹងនាចស្រកខកចិត្តព្រោះស្នេហ៍  រឿងយើងប្រួលប្រែព្រោះតែរូបស្រី

ម្លប់ឈើមាត់បឹងរំពឹងភក្ដី                    ឥឡូវរឿងថ្មីប្រល័យអ្នកហើយ។

៤ វាលស្មៅខៀវខ្ចីស្ដីសួររកនាង          ស្ងាត់អស់សូរសៀងធ្លាប់ច្រៀងឆ្លងឆ្លើយ

សំនួររាប់លានម្ដេចគ្មានចម្លើយ           ឬអូនភ្លេចហើយឆ្លើយប្រាប់បងផង។

៥ សូមឆ្លើយមួយម៉ាត់មិនដាច់សង្ខារ   ត្រឹមឮវាចាក៏អស់សៅហ្មង

សុំត្រឹមពាក្យពិតម្ដេចអូនក្បត់បង        ក្បត់រឿងកន្លងធ្លាប់ស្មោះភក្ដី។

៦ អក្ខរាខូចចិត្តផ្ដិតជូនរឿងពិត          ឱ!គូជីវិតម្ដេចអូនប្រែថ្មី

សម្បថអក្ខរាចាដោយមាត់ស្រី             ឥឡូវសម្ដីឆ្ងាយស្មើជើងមេឃ៕

និពន្ធដោយ៖ ណូត ខេមរិន្ទ

១៤­-០១-២០១៣                                                   

សម្រស់ធម្មជាតិ

​​​​​សម្រស់ធម្មជាតិ

១​ ស្រុកខ្មែរស្នេហ៍ស្នង នួនល្អងគយគន់

ស្រស់ស្រីល្វតល្វន់ គន់មើលធម្មជាតិ

វាលវែងអន្លាយ រៀងរាយព្រោងព្រៀត

រុក្ខាដុះជ្រៀត ដងផ្លូវបំព្រង។

២​ ភ្នំពណ៌បៃតង ដងព្រែកខៀវខ្ចី

ប្រៀបបានភក្ត្រស្រី ភក្ដីទងវង

ធម្មជាតិស្រុកខ្មែរ ដូចស្នេហ៍មានបង

រីករាយកន្លង បំណងជួបជួន។

កម្ពុជាដែនដីសុវណ្ណភូមិ

ប្រទេសកម្ពុជាជាដែនដីសុវណ្ណភូមិពោពេញទៅធម្មជាតិស្រស់ស្អាត។ គ្រប់ទីកន្លែង នៅពេល

ព្រះសូរិយារៀបអស្ដង្គត យើងនឹងឃើញទេសភាពដ៏ស្រស់ត្រកាល ដែលស្រោបរស្មីពណ៌ 

មាសនៃឱភាសដួងទិនករទៀតនោះ ធ្វើឲ្យយើងមិនអាចនឹងបំភ្លេច ឬថាមិនចង់គយគន់នោះ

ឡើយ។ មួយវិញទៀត ទេសភាពនៃដែនដីមួយនេះកាលណាបើយើងឃ្លាតឆ្ងាយភូមិស្រុក

ទៅរស់នៅឯនាយឆ្ងាយ នោះយើងនឹកស្រណោះអាឡោះ អាល័យដល់ស្រុកកំណើតរបស់
ខ្លួនជាក់ជាមិនខាន ជាពិសេសទៀតនោះគឺពេលផ្ទៃមេឃដ៏ស្រទំរកបង្អុរព្រះភិរុណតែម្ដង ។ 

កម្ពុជា ដែនដីជាទីមោទនៈនៃខ្ញុំ 

ស្រុកកោះធំ ខេត្តកណ្ដាល

ថ្ងៃសៅរ៍ ទី២៧ កក្កដា ២០១៣

ណូត ខេមរិម្ទ (ខ្មែរ សូវិននា)